कुकुभ छंद(गाँव छोंड़ के जावत हावस)

*कुकुभ छंद प्रयास-1*

       *गाँव*

*(सुधार के बाद)*

*गाँव छोड़ के जावत हावस*, *पाछू बड़ पछताबे गा*|

*दया मया अउ मेल गाँव कस*, *कहाँ शहर मा पाबे गा* ||

*धनहा डोली हवय गाँव मा*, *छाँव हवय अमराई के*|

*ग्वाला के बंशी के सुर हे*, *मया बाप अउ दाई के* ||

*देख गाँव मा हरियाली हे*, *अउ ममहावत माटी हे*|

*गिल्ली डंडा भटकउला हे, भौंरा खो-खो बाँटी हे*||

*सुआ ददरिया गीत भूल झन*,

*डिस्को मा भरमाबे गा*|

*गाँव छोंड़ के जावत हावस, पाछू बड़ पछताबे गा*||   |1|

*खेती बारी के बूता हर, लागत तोला भारी हे*|

*जे माटी मा खेले कूदे, लागत ओ बीमारी हे*||

*जब ले गे हस आन शहर मा, सुन्ना गाँव हवय भाई*|

*सुरता करके आँसू झरथे , बड़ रोवत रहिथे दाई* ||

*दाई के कोरा सुरता कर, जब तैं हा खो जाबे गा*|

*गाँव छोंड़ के जावत हावस, पाछू बड़ पछताबे गा*||  | 2|

*कचरा,धुआँ,प्रदूषण हावय, शहर मा झगरा दंगा हे*|

*जेवन सादा हवय गाँव मा, नदिया जइसे गंगा हे*||

*गाँव खड़े रहिथे सुख-दुख मा, काम सबो के आथे रे*|

*शहर हवय मतलब के साथी, गीत लोभ के गाथे रे* ||

*मर जाबे कोनो नइ पूछय, शहर कभू झन जाबे गा|*

*गाँव छोंड़ के जावत हावस, पाछू बड़ पछताबे गा*||  |3|

*भीड़ भाड़ के जंगल मा जब, रहि के मन जब थक जाही* |

*शोर-शराबा ला सुन के जब, माथा हा तोर पिराही*||

*दोसा पीजा चाउमीन मन, चारे दिन तोला भाही*|

*लोभ कपट अउ स्वारथ ले जब, दुख तोरे अंतस पाही*||

*भोलापन ला अपन गाँव के,*मन मा तैं सोरियाबे गा*|

*गाँव छोड़ के जावत हावस, पाछू बड़ पछताबे गा* || |4|

*सुनिल शर्मा नील*