शुक्रवार, 11 सितंबर 2015

बच्छर म एक बेर आथस रे तीजा

बच्छर म एक बेर आथस रे तीजा
सालभर ले अगोरवाथस रे तीजा
का जानबे कतका तोला सोरियाथन
गिन-गिन दिन हमन तोला बलाथन
मइके ले तीजा लेगेबर आथे भाई
अड़बड़ दुलार करथे बाबू अउ दाई
नानपन के संगी-सहेली ल पाथन
सुख-दुःख के गोठ जीभर गोठियाथन
बनथे कतरा,खुरमी,मुठिया अउ ठेठरी
खाथन सबोझन छोकरी अउ डोकरी
एक दिन पाछु खाथन करू भात
तीजा के दिनभर रहिथन उपास
भोले अउ उमा ल हमन मनाथन
अपन चुड़ी के अमरता ल पाथन
बिहान दिन घूम-घूम फरहार खाथन
नवा-नवा लुगरा के मान ल पाथन
लईका मन घलो पाथे कपड़ा-मिठइ
पूछत रहिथे तीजा कब आही दाई
रहय अमर ए छत्तीसगढ़िया संस्कीरति
मिलाथे ददा ले जउन ओखर दुलौरी बेटी|
सुनिल शर्मा"नील"
थान खम्हरिया,बेमेतरा(छ.ग.)
7828927284
9755554470
रचना-11/09/2015
समय-11 बजे रतिहा

कोई टिप्पणी नहीं:

एक टिप्पणी भेजें